Miturut carios, Sultan Agung damel segara kanthi
mbendung kali opak. Segara menika saklajengipun dipunparingi nama Segoroyoso ingkang
artosipun segara gawean. Segara gawean utawi Segoroyoso menika dipunginakaken
kangge sarana pitepangan antawis Kanjeng Sultan Agung kalihan Ratu Kidul. Salah
satunggaling dinten Sultan Agung nembe wonten sakiwa tengenipun Segoroyoso
inggih menika wonten ing bukit Permoni ingkang wonten ing sisih kidul kulon
Segoroyoso, boten kanyana-nyana dipunrawuhi Ratu Kidul ingkang nitih kuda
Sembrani, kuda Sembrani inggih menika jinising jaran ananging gadhah swiwi
ingkang saged mabur. Kanthi rawuhipun Ratu Kidul kasebut mila Sultan Agung
wawanpangandikan kalihan Ratu Kidul wonten ing Segoroyoso. Nalika Ratu Kidul
saweg wawanpangandikan kalihan Sultan Agung, kuda Sembrani kala wau dipuntaleni
wonten ing sakiwa tengenipun bukit Permoni. Wonten ing sakiwa tengenipun papan bukit
Permoni kasebut wonten tapak tilas utawi jejak-jejak ingkang kalihan masarakat
dipungayutaken kalihan kawontenanipun kuda Sembrani. Ing ngriku wonten sekawan
lubang tilas sikilipun jaran utawi tapak jaran lan ing sisih ngajengipun wonten
legokan ingkang dipunanggep minangka wadhah ombenanipun kuda Sembrani. Lan dugi
samenika dening masarakat sakiwa tengen taksih dipunlestantunaken
kawontenanipun satemah sinaosa ing sakiwa tengenipun bukit kasebut dipuntambang
watunipun dening masarakat kawontenan tapak tilas kasebut taksih dipunjagi. Waliy Asluki/10205244009
Langganan:
Posting Komentar (Atom)
0 komentar:
Posting Komentar